سرگودھا: تحصیل سلانوالی میں کمسن بچی سیوریج نالے میں گر گئی، بروقت ریسکیو سے محفوظ
سرگودھا کی تحصیل سلانوالی میں کمسن بچی کے سیوریج نالے میں گرنے کا افسوسناک واقعہ پیش آیا، تاہم دکان کے عملے اور مقامی افراد کی بروقت کارروائی کے باعث بچی محفوظ رہی۔
تفصیلات کے مطابق واقعہ بے نظیر پارک کے قریب پیش آیا جہاں بچی اپنی والدہ کے ہمراہ ایک دکان میں موجود تھی۔ دکان کے مالک کے مطابق بچی کپڑوں کی دکان کے باہر لگے شیشے کے ہینڈل کو پکڑ کر کھیل رہی تھی کہ اچانک پھسل گئی اور سیوریج نالے میں جا گری۔
واقعے کے فوراً بعد دکان کے عملے اور اردگرد موجود لوگوں نے فوری طور پر بچی کو نالے سے نکال لیا اور اسے والدہ کے حوالے کردیا۔ خوش قسمتی سے بچی کو کوئی سنگین چوٹ نہیں آئی۔
واقعے کے بعد شہریوں نے علاقے میں کھلے اور غیر محفوظ سیوریج نالوں پر تشویش کا اظہار کرتے ہوئے مطالبہ کیا ہے کہ انتظامیہ فوری نوٹس لے اور حفاظتی اقدامات یقینی بنائے تاکہ آئندہ ایسے واقعات سے بچا جا سکے۔
