بلوچستان کی کشیدہ صورتحال، پنجاب بلوچستان سرحدی راستے ہر قسم کی ٹریفک کے لیے بند
بلوچستان میں کشیدہ امن و امان کی صورتحال کے پیش نظر پنجاب اور بلوچستان کے درمیان سرحدی راستوں کو ہر قسم کی ٹریفک کے لیے بند کردیا گیا ہے۔ ڈپٹی کمشنر ڈیرہ غازی خان محمد عثمان خالد نے تصدیق کرتے ہوئے بتایا کہ بلوچستان جانے والی تمام ٹریفک کو تاحکمِ ثانی روک دیا گیا ہے۔
ڈپٹی کمشنر کے مطابق فی الحال مسافر ڈیرہ غازی خان کے راستے بلوچستان سفر نہیں کرسکیں گے۔ انہوں نے بتایا کہ بین الصوبائی سرحدی مقامات بواٹہ، راکھی گاج اور تونسہ موسیٰ خیل روڈ پر ہر طرح کی ٹریفک معطل کردی گئی ہے اور کسی بھی گاڑی کو پنجاب سے بلوچستان جانے کی اجازت نہیں دی جا رہی۔
انتظامیہ کا کہنا ہے کہ یہ فیصلہ شہریوں کی جان و مال کے تحفظ اور ممکنہ سکیورٹی خدشات کے پیش نظر کیا گیا ہے۔ سکیورٹی صورتحال بہتر ہونے تک پابندی برقرار رہے گی، جبکہ عوام سے اپیل کی گئی ہے کہ غیر ضروری سفر سے گریز کریں اور انتظامیہ کے ساتھ تعاون کریں۔
واضح رہے کہ حالیہ دنوں میں کوئٹہ، گوادر، پنجگور سمیت بلوچستان کے مختلف علاقوں میں دہشت گرد حملوں کی کوششیں ناکام بنائی گئیں۔ سکیورٹی فورسز کی مؤثر کارروائیوں کے دوران 3 خودکش بمباروں سمیت 92 دہشت گرد ہلاک کیے گئے ہیں۔
آئی ایس پی آر کے مطابق دہشت گردی کے منصوبہ سازوں، سہولت کاروں اور معاونین کو ہر صورت انصاف کے کٹہرے میں لایا جائے گا۔ بیان میں کہا گیا ہے کہ عزمِ استحکام کے تحت دہشت گردی کے مکمل خاتمے تک سکیورٹی آپریشنز جاری رہیں گے۔
