پاکستانی نژاد امریکی میوزک ڈائریکٹر حنان حسین کا بڑا اعزاز، Clio Music Awards جیت لیے، گریمی ایوارڈز میں بھی نامزد
پاکستانی نژاد امریکی میوزک ڈائریکٹر حنان حسین نے عالمی سطح پر پاکستان کا نام روشن کرتے ہوئے ایک بڑا اعزاز اپنے نام کرلیا۔ حنان حسین نے امریکا میں ہونے والے معروف Clio Music Awards میں میوزک ویڈیو کے بہترین ڈائریکٹر کا ایوارڈ جیت لیا ہے، جو میوزک انڈسٹری میں تخلیقی صلاحیتوں کا ایک معتبر عالمی اعزاز سمجھا جاتا ہے۔
اس کامیابی کے ساتھ ساتھ حنان حسین کے لیے ایک اور بڑی خوشخبری بھی سامنے آئی ہے۔ انہیں دنیا کے سب سے معتبر موسیقی ایوارڈز گریمی ایوارڈز میں بھی نامزد کرلیا گیا ہے۔ حنان حسین کو بہترین میوزک ویڈیو کی کیٹیگری میں نامزدگی حاصل ہوئی ہے، جو کسی بھی فنکار کے لیے غیر معمولی اعزاز تصور کی جاتی ہے۔
واضح رہے کہ گریمی ایوارڈز کی رنگا رنگ تقریب اتوار کو منعقد ہوگی، جہاں دنیا بھر کے نامور فنکار شریک ہوں گے۔ حنان حسین کی نامزدگی کو پاکستانی اور امریکی میوزک حلقوں میں بھرپور پذیرائی مل رہی ہے، جبکہ شوبز اور موسیقی سے وابستہ شخصیات نے انہیں اس کامیابی پر مبارکباد دی ہے۔
حنان حسین کی اس کامیابی کو پاکستانی نژاد فنکاروں کے لیے ایک اہم سنگِ میل قرار دیا جا رہا ہے، جو عالمی سطح پر اپنی محنت، تخلیقی وژن اور صلاحیتوں کے بل بوتے پر پہچان بنا رہے ہیں۔
