بھکر: اشتہاری ملزم کی گرفتاری کے دوران فائرنگ، 7 سالہ بچی جاں بحق، پولیس اہلکار زخمی
بھکر کے علاقے منگو چنگڑ میں اشتہاری ملزم کی گرفتاری کے دوران فائرنگ کے تبادلے میں 7 سالہ معصوم بچی جاں بحق ہوگئی، جبکہ ایک پولیس اہلکار زخمی ہوگیا۔ افسوسناک واقعے کے بعد علاقے میں شدید خوف و ہراس پھیل گیا۔
پولیس کے مطابق سی سی ڈی کی ٹیم نے اقدامِ قتل کے مقدمے میں مطلوب اشتہاری ملزم کی گرفتاری کے لیے اس کے گھر پر چھاپہ مارا۔ کارروائی کے دوران ملزم اور پولیس کے درمیان فائرنگ کا تبادلہ ہوا، جس کی زد میں آکر گھر میں موجود 7 سالہ بچی گولی لگنے سے موقع پر ہی جاں بحق ہوگئی۔
پولیس کا کہنا ہے کہ فائرنگ کے دوران ایک پولیس اہلکار بھی زخمی ہوا، جسے فوری طور پر قریبی اسپتال منتقل کردیا گیا، جہاں اسے طبی امداد فراہم کی جا رہی ہے۔ واقعے کے بعد ملزم موقع سے فرار ہونے میں کامیاب ہوگیا۔
پولیس کے مطابق فرار ملزم کی گرفتاری کے لیے مختلف مقامات پر چھاپے مارے جا رہے ہیں اور واقعے کی ہر پہلو سے تحقیقات جاری ہیں۔ پولیس حکام کا کہنا ہے کہ ذمہ داروں کے خلاف قانون کے مطابق کارروائی کی جائے گی۔
واقعے پر شہری حلقوں کی جانب سے گہرے دکھ اور افسوس کا اظہار کیا جا رہا ہے، جبکہ معصوم بچی کی ہلاکت نے ایک بار پھر پولیس کارروائیوں کے دوران حفاظتی اقدامات پر سوالات کھڑے کر دیے ہیں۔
