کراچی: عزیزآباد میں جعلی پولیس اہلکار گرفتار، شہریوں کو لوٹنے والا گروہ بے نقاب
کراچی کے علاقے عزیزآباد میں پولیس نے بروقت کارروائی کرتے ہوئے جعلی پولیس اہلکار کو گرفتار کرلیا۔ پولیس کے مطابق گرفتار ملزم شہریوں کو پولیس اہلکار ظاہر کرکے ڈرا دھمکا کر لوٹنے کی وارداتوں میں ملوث تھا، جس سے علاقے میں خوف و ہراس پھیل رہا تھا۔
پولیس کا کہنا ہے کہ گرفتار ملزم کی شناخت شوکت کے نام سے ہوئی ہے، جبکہ اس کے دو ساتھی کارروائی کے دوران موقع سے فرار ہوگئے۔ فرار ہونے والے ملزمان کے نام عارف کمانڈو اور سلیم بتائے جا رہے ہیں، جن کی گرفتاری کے لیے چھاپے مارے جا رہے ہیں۔
پولیس کے مطابق گرفتار ملزم کے قبضے سے جعلی پولیس کارڈ، پولیس جیکٹ، موبائل فون اور واردات میں استعمال ہونے والا دیگر سامان بھی برآمد کرلیا گیا ہے۔ ابتدائی تفتیش میں ملزم نے شہریوں کو پولیس کا رعب دکھا کر لوٹنے کا انکشاف کیا ہے۔
پولیس حکام کا کہنا ہے کہ ملزم کے خلاف مقدمہ درج کرلیا گیا ہے اور مزید تفتیش جاری ہے، جبکہ فرار ملزمان کو بھی جلد گرفتار کرلیا جائے گا۔ پولیس نے شہریوں سے اپیل کی ہے کہ مشکوک افراد یا سرگرمیوں کی فوری اطلاع پولیس کو دیں تاکہ ایسے جرائم کا بروقت سدباب کیا جا سکے۔
