اسلام آباد: محکمہ موسمیات نے ملک کے مختلف علاقوں میں گرج چمک کے ساتھ مزید بارش کی پیشگوئی کی ہے۔ ملک کے بیشتر علاقوں میں موسم سرد اور خشک رہنے کی توقع ہے، تاہم گلگت بلتستان، کشمیر، مری، گلیات، خطہ پوٹھوہار اور اسلام آباد میں چند مقامات پر بارش اور پہاڑوں پر برفباری کا امکان ہے۔
اسلام آباد میں وقفے وقفے سے بارش کا امکان ہے، جبکہ بعض مقامات پر موسلادھار بارش کی پیشگوئی کی گئی ہے۔ مری، گلیات اور گرد و نواح میں مزید بارش و برفباری ہو سکتی ہے۔ اس کے علاوہ، راولپنڈی، چکوال، جہلم، گجرات، گوجرانوالہ، سیالکوٹ، نارووال، لاہور، شیخوپورہ، اوکاڑہ، فیصل آباد، جھنگ اور ٹوبہ ٹیک سنگھ میں بھی بارش ہونے کی توقع ہے۔
بالائی خیبرپختونخوا میں گرج چمک کے ساتھ بارش کی پیشگوئی کی گئی ہے۔ خاص طور پر دیر، سوات، شانگلہ، کوہستان، مانسہرہ، بٹگرام، بونیر، باجوڑ، مالاکنڈ، ہری پور، صوابی اور مردان میں مزید بارش کا امکان ہے، جبکہ ایبٹ آباد، چارسدہ اور نوشہرہ میں گرج چمک کے ساتھ بارش ہونے کی توقع ہے۔
بلوچستان کے بیشتر اضلاع میں موسم خشک اور سرد رہنے کا امکان ہے، جبکہ سندھ کے بیشتر حصوں میں بھی موسم خشک رہنے کی پیشگوئی کی گئی ہے۔ گلگت بلتستان اور آزاد کشمیر کے مختلف حصوں میں مزید بارش اور برفباری کا امکان ہے۔
دوسری جانب وادی لیپہ میں برفباری کا سلسلہ جاری ہے جس کی وجہ سے سردی کی شدت میں مزید اضافہ ہو گیا ہے۔ برفانی تودے گرنے کے باعث وادی لیپہ کا دیگر علاقوں سے زمینی رابطہ منقطع ہو گیا ہے، جس سے مواصلاتی نظام متاثر ہوا ہے اور متعدد علاقے بجلی سے محروم ہیں۔ برفباری کے سبب سرکاری اور پرائیویٹ تعلیمی اداروں میں تعطیلات بھی دی گئی ہیں۔
