پاکستانی امریکی طالبہ عمارہ خان نے احتجاجاْ امریکا کی صف اول کی یونیورسٹی کولمبیا یونیورسٹی کے داخلے کی آفر ٹھکرادی۔
غیر ملکی خبر رساں ادارے کے مطابق طالبہ عمارہ خان نے یونیورسٹی انتظامیہ کو جوابی ای میل میں لکھا کہ آپ کیمپس پر طلبہ کے آزادی اظہار کو تحفظ دینے میں ناکام ہیں۔عمارہ خان کی یونیورسٹی انتظامیہ کو جوابی ای میل کے مطابق حالیہ واقعات کی روشنی میں کولمبیا یونیورسٹی کا diversity اور inclusion کی اقدار کو فروغ دینے کا دعویٰ منافقانہ ہے، پسماندہ کمیونٹیز کی آوازوں کو تحفظ دینے میں ناکامی یونیورسٹی کے قول و فعل میں تضاد کی علامت ہے۔طالبہ نے اپنی ای میل میں مزید لکھا کہ ایک ایسی یونیورسٹی جو تنقیدی سوچ اور آزاد مکالمے کو فروغ دینے کی دعوے دار ہو، اسے انصاف کے لیے جدوجہد کرنےوالوں کو خاموش نہیں کرانا چاہیے، ایک باضمیر مسلمان امریکی ہونے کی حیثیت سے میں ایک ایسے تعلیمی ادارے کا انتخاب نہیں کرسکتی جہاں فکری آزادی پر اربابِ اختیار کو خوش کرنے کو ترجیح دی جائے۔دوسری جانب عمارہ کے والد عمیر خان نے جیو نیوز سے گفتگو میں بیٹی کے فیصلے کو درست قرار دیا اور کہا کہ بیٹی نے بہادرانہ اور درست فیصلہ کیا جو در اصل یونیورسٹی کے دوغلے پن کے خلاف احتجاج ہے ، بیٹی کے فیصلے پر خوشی ہوئی۔
