اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے اپنی 25ویں سالگرہ کے موقع پر پاکستان میں پہلی بار ڈی میٹریلائزڈ آئی ڈی کارڈ متعارف کرا دیا۔
اس موقع پر نادرا ہیڈ کوارٹر میں ایک پروقار تقریب منعقد کی گئی، جس میں صدر مملکت آصف علی زرداری اور وزیراعظم شہباز شریف کے تہنیتی پیغامات پڑھ کر سنائے گئے۔صدر مملکت نے اپنے پیغام میں کہا کہ نادرا کی خدمات شہریوں کو محفوظ اور قانونی شناخت فراہم کرنے کے لیے لائق تحسین ہیں۔ انہوں نے اس امر پر زور دیا کہ نادرا جدید ٹیکنالوجی کو مزید وسعت دے کر اپنی کارکردگی میں بہتری لائے۔
وزیراعظم شہباز شریف نے بھی نادرا کی کارکردگی کو سراہتے ہوئے کہا کہ ٹیکنالوجی کے میدان میں نادرا کی مہارت ملکی معیشت کی ترقی میں بنیادی کردار ادا کرے گی۔تقریب میں وزیر داخلہ محسن نقوی نے خطاب کرتے ہوئے کہا کہ ڈی میٹریلائزڈ کارڈ، پاکستان میں ڈیجیٹل شناخت کی طرف ایک بڑا قدم ہے۔ انہوں نے بتایا کہ جلد ہی ڈیجیٹل تصدیقی نظام بھی متعارف کرایا جائے گا اور اس کے لیے مربوط سیکیورٹی نظام وضع کیا جا رہا ہے۔
نادرا کے بانی چیئرمین زاہد احسان تقریب کے مہمان خصوصی تھے، جنہوں نے نادرا کی سلور جوبلی پر اس اہم اقدام کو سراہا اور ڈیجیٹل شناخت کے شعبے میں مزید جدت کی ضرورت پر زور دیا۔
