انگلش کرکٹ بورڈ نے پٹودی ٹرافی ختم کرنے کا فیصلہ کرلیا ہے جس پر ان کی اہلیہ شرمیلا ٹیگور پریشان ہوگئیں تاہم بھارتی بورڈ خاموش ہے۔
انگلینڈ اینڈ ویلز کرکٹ بورڈ نے بھارتی کرکٹ ٹیم کے سابق کپتان ٹائیگر نواب منصور علی خان پٹودی سے منسوب پٹودی ٹرافی ختم کرنے کا فیصلہ کر لیا ہے، یہ ٹرافی بھارت اور انگلینڈ کے درمیان انگلینڈ میں کھیلی جانے والی ٹیسٹ سیریز کے فاتح کو دی جاتی تھی۔جون میں ورلڈ ٹیسٹ چیمپئن شپ فائنل کے بعدبھارتی کرکٹ ٹیم نے انگلینڈ کا دورہ کرنا ہے تاہم سیریز سے قبل اس بارے میں باضابطہ اعلان کیا جائے گا ۔ جون جولائی میں روہت شرما کی قیادت میں بھارتی کرکٹ ٹیم انگلینڈ میں پانچ ٹیسٹ میچوں کی سیریز کھیلے گی۔
سیف علی خان کو انگلش بورڈ کا خط
ای سی بی نے بھارت کے سابق کپتان مرحوم منصور علی خان پٹودی کے بیٹے، بالی وڈ اداکار سیف علی خان کو خط لکھ کر اس فیصلے سے آگاہ کیا جس نے منصور علی خان کی اہلیہ، مشہور اداکارہ شرمیلا ٹیگور کو شدید صدمے میں مبتلا کر دیاہے ۔شرمیلا ٹیگور نے کہا مجھے ای سی بی سے براہ راست کوئی اطلاع نہیں ملی لیکن انہوں نے سیف کو خط لکھا ہے کہ وہ ٹرافی کو ریٹائر کر رہے ہیں۔ اگر بی سی سی آئی ٹائیگر کی میراث کو یاد رکھنا چاہتی ہے یا نہیں، یہ ان کا فیصلہ ہے میں اس بارے میں زیادہ بات نہیں کرنا چاہتی۔دوسری جانب بی سی سی آئی نے ابھی تک اس بارے میں کوئی باضابطہ بیان جاری نہیں کیا اور خاموش ہے، البتہ بھارتی کرکٹ بورڈ کے ذرائع کا کہنا ہے کہ وہ اس بارے میں انگلش بورڈ سے درخواست کررہے ہیں کہ وہ اپنے فیصلے پر نظر ثانی کریں۔
پٹودی ٹرافی کب شروع ہوئی؟
پٹودی ٹرافی پہلی بار 2007 میں دونوں ممالک کے درمیان 75 سالہ کرکٹ تعلقات کے موقع پر شروع کی گئی تھی۔نواب منصور علی خان پٹودی کے والد نواب افتخار علی خان پٹودی1932اور1946میں بھارت اور انگلینڈ دونوں ملکوں کی جانب سے ٹیسٹ کھیل چکے ہیں۔منصور علی خان پٹودی نے1961سے1975تک بھارت کے لیے 46ٹیسٹ کھیلے۔ ایک حادثے میں ان کی ایک آنکھ ضائع ہوگئی اور وہ ایک آنکھ سے انٹر نیشنل کرکٹ کھیلتے رہے۔کرکٹ سے ریٹائر ہونے کے بعد وہ صحافت کے پیشے سے منسلک ہوگئے، نواب پٹودی کے فرسٹ کزن اور مشہور سفارت کار شہر یار محمد خان پاکستان کرکٹ بورڈ کے چیئر مین رہے۔
