واشنگٹن: ٹیکنالوجی کمپنی مائیکروسافٹ کی 50 ویں سالگرہ کی تقریب کے دوران ملازمین نے فلسطین میں ہونے والے اسرائیلی مظالم کے خلاف احتجاج کیا۔
تفصیلات کے مطابق احتجاج اس وقت شروع ہوا جب مائیکروسافٹ اے آئی (AI) کے سی ای او مصطفیٰ سلیمان کمپنی کے AI اسسٹنٹ "Copilot” سے متعلق نئی اپڈیٹس اور مستقبل کے وژن پر بات کر رہے تھے۔
تقریب کے دوران کچھ ملازمین نے احتجاج کیا اور اس موقع پر مائیکروسافٹ میں کام کرنے والی ایک خاتون ابتہال ابوسعید نے اسٹیج کے قریب آکر کہا کہ "مصطفیٰ تمہیں شرم آنی چاہیے، تم کہتے ہو کہ تم اے آئی (AI) کو بہتری کے لیے استعمال کرنا چاہتے ہو لیکن مائیکروسافٹ اسرائیلی فوج کو AI ہتھیار فراہم کر رہا ہے، 50 ہزار لوگ قتل ہوچکے ہیں اور مائیکروسافٹ ہمارے خطے میں اس نسل کشی کو تقویت دے رہا ہے ۔خاتون کے احتجاج پر ردعمل دیتے ہوئے سی ای او مصطفیٰ سلیمان نے کہا کہ ” آپ کے احتجاج کا شکریہ، میں نے آپ کو سن لیا۔
مصطفیٰ سلیمان کے جواب پر خاتون ملازمہ نے کہا کہ ” آپکے ہاتھوں پر خون ہے، سارے مائیکروسوفٹ کے ہاتھ خون سے رنگے ہیں۔رپورٹ کے مطابق فلسطین کے حق میں ہونے والے احتجاج کے موقع پر مائیکروسافٹ کے بانی بل گیٹس اور سابق سی ای او اسٹیو بالمر بھی تقریب میں موجود تھے۔
