بھارت کے اسٹار بیٹر ویرات کوہلی نے انڈین پریمیئر لیگ(آئی پی ایل) میں ایک منفرد سنگ میل عبور کر لیا۔
آئی پی ایل کی ٹیم رائل چیلنجرز بنگلور کے بیٹر ویرات کوہلی نے جمعرات کو دہلی کیپیٹلز کے خلاف نئی تاریخ رقم کی۔ویرات کوہلی آئی پی ایل میں ایک ہزار باؤنڈریز(چوکے اور چھکے) لگانے والے دنیا کے پہلے کھلاڑی بن گئے۔آئی پی ایل کے تمام 18 سیزن میں شرکت کرنے والے محض 4 کھلاڑیوں میں شامل کوہلی اب تک 257 میچز کھیل چکے ہیں، جن میں انہوں نے 721 چوکے اور 280 چھکے لگائے ہیں۔
ویرات کوہلی نے ایک بار پھر تاریخ رقم کردی، اب کونسا ریکارڈ اپنے نام کیا؟
کوہلی نے ایک ہزار باؤنڈریز مکمل کرنے کا سنگ میل چناسوامی اسٹیڈیم بنگلورو میں دہلی کیپٹلز کے خلاف بیٹنگ کرتے ہوئے چوتھے اوور کی تیسری گیند پر اکشر پٹیل کو چھکا مار کر عبور کیا۔کوہلی پہلے ہی آئی پی ایل میں سب سے زیادہ چوکے مارنے والے بیٹر ہیں۔ جہاں تک چھکوں کی بات ہے، اس فہرست میں وہ کرس گیل (357) اور روہت شرما (282) کے بعد تیسرے نمبر پر ہیں۔اس کے علاوہ ویرات کوہلی آئی پی ایل کی تاریخ سب سے زیادہ رنز بنانے والے بیٹر بھی ہیں۔ انہوں نے 257 میچز میں 8 ہزار 190 رنز اسکور کیے ہیں۔
