ایچ بی ایل پاکستان سپر لیگ (پی ایس ایل) 10کے چھٹے میچ میں لاہور قلندرز نے کراچی کنگز کو 65 رنز سے شکست دے دی۔
کراچی میں کھیلے گئے میچ میں لاہور قلندرز کےکپتان شاہین شاہ آفریدی نےکراچی کنگز کے خلاف ٹاس جیت کر بیٹنگ کا فیصلہ کیا۔لاہور قلندرز نے پہلےکھیلتے ہوئے مقررہ 20 اوورز میں 6 کھلاڑیوں کے نقصان پر 201 رنز بنائے۔لاہور قلندرز کی جانب سے فخر زمان نے76 اور ڈیرل مچل نے 75 رنز کی اننگز کھیلی۔
ان کے علاوہ سیم بلنگز نے 19 رنز بنائے، محمد نعیم 7 اور عبداللہ شفیق 6 رنز بناسکے۔کراچی کنگز کی جانب سے حسن علی نے 28 رنز دے کر 4 کھلاڑیوں کو آؤٹ کیا۔عباس آفریدی نے ایک وکٹ حاصل کی۔202 رنز کے ہدف کے تعاقب میں کراچی کنگز کی پوری ٹیم 20 ویں اوور میں 136 رنز پر ڈھیر ہوگئی۔کراچی کنگز کی جانب سے خوشدل شاہ کے علاوہ کوئی بیٹر مزاحمت نہ کرسکا، جنہوں نے 39 رنز بنائے۔
ان کے علاوہ حسن علی نے27 ، ٹم سیفرٹ اور شان مسعود نے 18،18 رنز بنائے۔کنگز کے کپتان ڈیوڈ وارنر پھر ناکام رہے اور بغیر کوئی رن بنائے آؤٹ ہوگئے۔ جیمز ونس اور عرفات منہاس بھی صفر پر آؤٹ ہوئے۔لاہور قلندرز کی جانب سے شاہین شاہ آفریدی اور رشاد حسین نے 3،3 وکٹیں حاصل کیں، سکندر رضا نے 2 کھلاڑیوں کو آؤٹ کیا۔
