مالے : مالدیپ نے فلسطینی عوام سے یکجہتی کے اظہار کے طور پر اسرائیلی پاسپورٹ رکھنے والے افراد کے ملک میں داخلے پر پابندی لگا دی ہے۔
غیر ملکی خبر رساں ادارے کے مطابق مالدیپ کی پارلیمنٹ نے اس پابندی کے بل کی منظوری دی، جس پر صدر محمد معیزو نے بھی دستخط کر دیے۔ یہ قانون فوری طور پر نافذ العمل ہو گیا ہے۔صدر کے دفتر سے جاری بیان میں کہا گیا ہے کہ یہ فیصلہ اسرائیل کی جانب سے غزہ میں جاری "ظالمانہ کارروائیوں” کی مذمت کے طور پر کیا گیا ہے۔ قانون کے تحت اب اسرائیلی پاسپورٹ رکھنے والے افراد مالدیپ میں داخل نہیں ہو سکیں گے، البتہ دوہری شہریت رکھنے والے افراد دوسرے ملک کے سفری دستاویزات استعمال کر کے ملک میں آ سکیں گے۔
یہ بل سب سے پہلے مئی 2024 میں اپوزیشن کے رکن پارلیمان میکائل احمد نسیم نے پیش کیا تھا، جسے 308 دن کی طویل کارروائی کے بعد پارلیمنٹ سے منظور کر لیا گیا۔ اس کے ساتھ ساتھ صدر معیزو نے فلسطینی عوام کی مدد کے لیے ایک خصوصی ایلچی مقرر کرنے اور "فلسطین سے یکجہتی” کے عنوان سے فنڈ ریزنگ مہم شروع کرنے کا بھی اعلان کیا ہے۔
