سندھ اولمپکس ایسوسی ایشن نے نیشنل گیمز ایک بار پھر ملتوی کردیے۔
سندھ اولمپکس نے ایک خط تمام متعلقہ اداروں کو جاری کیا جس میں ناگزیر وجوہات کی بنا پر نیشنل گیمز ملتوی کیے جانے کا بتایا گیا ہے۔نیشنل گیمز یکم مئی سے کراچی میں شروع ہونے تھے۔سندھ کو 18 سال بعد نیشنل گیمز کی میزبانی ملی تھی۔دوسری جانب ذرائع کا کہنا ہے کہ شدید گرمی ہیٹ ویو اور انٹر کے امتحانات کی وجہ سے نیشنل گیمز ملتوی کیے گئے حالانکہ مئی میں شدید گرمی اور ہیٹ ویو کا سب کو علم تھا اور انٹر کے امتحانات کا اعلان بھی کئی ماہ پہلے کیا جاچکا تھا۔
ذرائع کا کہنا ہے نیشنل گیمز کے انتظامات نہیں کیے جاسکے تھے، بیشتر گراؤنڈز اسپورٹس کمپلیکس میں اپ گریڈیشن کا کام بھی نہیں کرایا گیا تھا، نیشنل گیمز کا لوگو تیار ہوا نہ ہی ٹارچ ریلے شروع کی جاسکی۔واضح رہے کہ نیشنل گیمز اس سے قبل فروری میں کرانے کا اعلان کیا گیا تھا جس کو ملتوی کرکے شدید گرمی میں مئی میں کرانے کا فیصلہ کیا گیا تھا لیکن اب مئی میں گیمز ملتوی کردیے گئے۔نیشنل گیمز کی نئی تاریخوں کا اعلان بعد میں کیا جائے گا۔
