بلوچستان کے علاقے دکی میں کاؤنٹر ٹیررازم ڈیپارٹمنٹ نے کارروائی کرتے ہوئے مزدوروں اور سیکیورٹی فورسز پر حملوں میں ملوث 5 دہشت گردوں کو ہلاک کردیا۔
سی ٹی ڈی حکام کے مطابق بلوچستان کے علاقے دکی میں کارروائی کے دوران فائرنگ کے تبادلے میں 5 دہشت گرد مارے گئے۔حکام کا کہنا ہے کہ مارے گئے دہشت گردوں کا تعلق کالعدم تنظیم سے تھا جو دہشت گردی کی مختلف کارروائیوں میں ملوث تھے۔سی ٹی ڈی حکام کے مطابق دہشت گرد کوئٹہ کان کے مزدوروں، فورسز اور شہریوں پر حملوں میں ملوث تھے۔
واضح رہے کہ بلوچستان میں مزدوروں پر دہشت گردوں کے حملوں کے متعدد واقعات رپورٹ ہوچکے ہیں، جس میں درجنوں افراد جاں بحق ہوگئے جبکہ ملزمان کئی مزدوروں کو اغواء کرکے بھی لے جاچکے ہیں۔وزیراعلیٰ بلوچستان سرفراز بگٹی نے دُکی میں سیکیورٹی فورسز کی کامیاب کارروائی پر اظہار اطمینان کرتے ہوئے سی ٹی ڈی، ایف سی اور دیگر اداروں کے جوانوں کی بہادری کو سراہا ہے۔ انہوں نے کہا کہ دہشت گردی کے خلاف ریاستی ادارے پوری طرح متحرک ہیں، بلوچستان کو عدم استحکام سے دوچار کرنے کی ہر سازش ناکام بنائی جائے گی، عوام کے جان و مال کے تحفظ کیلئے حکومت ہر ممکن اقدامات کر رہی ہے۔وزیراعلیٰ بلوچستان کا کہنا ہے کہ دہشت گردوں کے سہولت کاروں کیخلاف بھی بلاتفریق کارروائی کی جائے گی، امن دشمن عناصر کو کسی صورت برداشت نہیں کیا جائے گا، بلوچستان میں امن و ترقی کے سفر کو ہر قیمت پر جاری رکھا جائے گا۔
