لاہور:پنجاب کے بڑے شہروں میں مرحلہ وار تعمیر ومرمت اور بحالی کے منصوبوں کی اصولی منظوری دے دی گئی۔
وزیراعلیٰ پنجاب مریم نوازشریف کی زیر صدارت خصوصی اجلاس ہوا جس میں صوبے بھر میں محکمہ لوکل گورنمنٹ اینڈ کمیونٹی ڈویلپمنٹ کے زیرا ہتمام نئے پراجیکٹس پر تفصیلی بریفنگ دی گئی۔دوران اجلاس پنجاب کے بڑے شہروں میں مرحلہ وار تعمیر ومرمت اور بحالی کے پراجیکٹس کی اصولی منظوری دی گئی۔پہلے مرحلے میں 59 بڑے شہروں میں سیوریج اینڈ ڈرینج انفراسٹرکچر تعمیر ہوگا، بڑے شہروں میں بارش کے پانی کے فوری نکاس کے لئے رین واٹر سٹوریج ٹینک بنائے جائیں گے، واٹر سپلائی ٹیوب ویل، بجلی بلوں کا بوجھ کم کرنے کیلئے سولر انرجی پر منتقل کئے جائیں گے، گلیوں کی تعمیر و مرمت اور ٹف ٹائل لگائی جائے گی، پہلے فیز میں شامل شہروں میں پارک بھی ڈویلپ ہونگے۔
وزیراعلیٰ پنجاب نے پارکس میں بچوں کیلئے جھولے اور سپورٹس کی دیگر سہولتیں فراہم کرنے کی بھی ہدایت کی۔مریم نواز نے پنجاب کے دیہات میں بھی یکساں ڈویلپمنٹ کی ہدایت کی، جس کے بعد دیہات میں ڈرینج سسٹم کی تعمیر و بحالی اور گلیوں میں ٹف ٹائل لگائی جائیں گی، دیہات کے ہر مرکزی قبرستان میں چار دیواری اور صفائی کا اہتمام کیا جائے گا، دیہات میں پارک اور پلے گراؤنڈ بھی بنائے جائیں گے، ہر گاؤں سائن بورڈ اور گھروں کی نمبر مارکنگ کی جائے گی۔وزیراعلیٰ مریم نوازشریف کی ہدایت پر دیہات کے جوہڑوں میں بائیوٹیکنالوجی سے صفائی کا پروگرام بنایا گیا ہے، گندے پانی کے جوہڑ میں مخصوص پودے لگانے سے بدبو اور گندگی کا خاتمہ ہوگا، گندے پانی کے جوہڑ میں لگائے گئے مخصوص پودے کی وجہ سے ماحولیاتی آلودگی کا بھی خاتمہ ہوگا، سپیشل پلانٹ کی جڑیں گندگی جذب کرنے کی صلاحیت رکھتی ہیں۔
اجلاس میں وزیراعلیٰ رورل روڈ بحالی پروگرام کا بھی جائزہ لیا گیا، دیہات کی 4500 کلو میٹر سڑکوں کی تعمیر و بحالی کی تجویز پر اتفاق کیا گیا، وزیراعلیٰ مریم نوازشریف پروگرام برائے یونین کونسل آفس پر تفصیلی بریفنگ دی گئی، عوام کی سہولت کیلئے ہر یونین کونسل میں میٹنگ ہال، کونسل روم اور سیکرٹری آفس بنائے جائیں گے۔مریم نواز نے کہا کہ تاریخ کا سب سے بڑا پروگرام ستھرا پنجاب کامیابی سے جاری ہے، شہری صوبے کو صاف بنانے کے لئے اپنا فرض بھی نبھائیں۔
