لاہور:وزیر اعلیٰ پنجاب مریم نواز نے ساڑھے 12لاکھ محنت کش خاندانوں کو راشن کارڈ دینے کا اعلان کیا ہے ۔ ورکرز اور کان کنوں کے لئے راشن کارڈ تقسیم کی تقریب سے خطاب کرتے ہوئے وزیراعلیٰ مریم نواز نے کہا کہ انڈیا اور پاکستان کے بارڈر پر کشیدگی ہے لیکن فکر کی کوئی ضرورت نہیں ۔
پاک فوج ہر خطرے کا مقابلہ کر سکتی ہے ۔ پاکستانی عوام سے کہنا چاہتی ہوں کہ کسی بھی پارٹی سے تعلق ہو ہمیں اس موقع پر پاک فوج کے ساتھ کھڑا ہونا چاہیے ۔وزیراعلیٰ مریم نوازشریف نے کہا کہ پاکستان کا کوئی بھی دشمن حملہ کرنے سے پہلے دس بار سوچے گاکیونکہ سب جانتے ہیں پاکستان ایٹمی قوت ہے ۔انہوں نے کہا کہ ہمارے ملک میں ہونے والی ترقی مزدور کی محنت کی مرہون منت ہے ۔
نئی سڑکیں، ہوائی اڈوں، ہسپتالوں اور موٹرویز بنانے کے لئے مزدور سب سے زیادہ محنت کرتا ہے ۔ ملک میں ترقی مزدورں اور محنت کشوں کی وجہ سے ہورہی ہے تو اس کو ثمر بھی ملنا چاہیے ۔وزیراعلیٰ نے کہا کہ راشن کارڈ کے ذریعے تین ہزارروپے ماہانہ ملے گا۔ خواہش اور دعا ہے کہ کسی غریب اور مزدور اور محنت کش کا بچہ خالی پیٹ نہ سوئے ۔راشن کارڈپروگرام ابتدائی طور پر 50بلین روپے سالانہ سے شروع کررہے ہیں۔پوری کوشش کریں گے کہ زیادہ سے زیادہ محنت کش راشن کارڈ پروگرام میں مزیدشامل ہوں۔
انہوں نے کہا کہ راشن کارڈ ان لوگوں کے لئے نہیں جوبھیک مانگتے ہیں بلکہ 15سے 16گھنٹے کام کرنے والوں کے لئے ہے ۔مظفر گڑھ سے آنے والے ورکر کو دیکھ کر خوشی ہوئی جو اعضا سے محروم ہونے کے باوجود محنت پر یقین رکھتا ہے ۔ ہر ورکرز کے لئے کم از کم اجرت 37ہزار کو ہر صورت یقینی بنا رہے ہیں۔انہوں نے کہا کہ جب سے اقتدار سنبھالا کوشش ہے کہ کسی شخص کو نہ آنا پڑے بلکہ حکومت خود مدد کو پہنچے ۔ لوگوں کا قطاروں میں لگ کر راشن وغیرہ دینامجھے اچھا نہیں لگتا۔ روٹی کی قیمت 25،30سے کم ہوکر 12 سے 15روپے پر آگئی یہ بھی کبھی نہیں ہوا تھا۔ وزیراعلیٰ نے کہا کہ سب صوبوں کے پاس وسائل ہیں، مسئلہ وسائل کا نہیں بلکہ خدمت کی نیت کا ہے ۔پوری طرح عوام کی جنگ لڑرہی ہوں، ہر گھر میں خوشحالی آنے تک چین سے نہیں بیٹھوں گی۔
پاکستان میں پہلی مرتبہ ہڈیوں، جلد، برن یونٹ، ٹراما سمیت جدید ترین میڈیکل سٹی لاہور بنارہے ہیں۔ سرگودھا میں نوازشریف انسٹی ٹیوٹ کارڈیالوجی جون تک فعال ہوجائے گا۔ماضی کی کسی بھی حکومت نے کسی بھی حکومت نے کبھی اتنے گھر نہیں بنائے ۔ ایک سال کے اندر30 ہزار گھر بن چکے اور رواں سال میں ایک لاکھ گھر وں کا ٹارگٹ پورا کریں گے ۔ گوجرانوالہ میں اس سال میٹرو بس سسٹم شروع ہوجائے گا۔
