کراچی: مغربی ہواؤں کے سسٹم کے تحت آج سے سندھ میں چند مقامات پر بارش کا امکان ہے۔
محکمہ موسمیات کے مطابق ملک کے بالائی حصے میں مغربی ہواؤں کا سسٹم اثر انداز ہورہا ہے جس کے تحت آج سے 5 مئی تک سندھ میں چند مقامات پر بارش کا امکان ہے۔محکمہ موسمیات نے بتایا کہ حیدرآباد، مٹیاری، سکھر، تھرپاکر اور ملحقہ علاقوں میں گرج چمک کے ساتھ ہلکی بارش متوقع ہے جب کہ کراچی میں آج سے اتوار کے دوران تیز ہوائیں چل سکتی ہیں، اسی دوران کراچی میں موسم گرم اور مرطوب رہنے کابھی امکان ہے۔
کے پی، کشمیر اور پنجاب میں آج بھی آندھی اور گرج چمک کے ساتھ بارش کا امکان
محکمہ موسمیات نے یہ بھی بتایا کہ 5 مئی سے سندھ پر اثرانداز سسٹم کو بحیرہ عرب سے نمی سے تقویت ملے گی، آئندہ ہفتے میں سندھ میں مزید بارشیں نظر آرہی ہیں، کراچی میں بھی یہ سسٹم کہیں کہیں بارش برسا سکتا ہے۔محکمہ موسمیات کے مطابق سسٹم کی شدت اور بارش کی درست پیشگوئی 5 مئی کے بعد کی جاسکتی ہے، مئی سندھ میں عام طور پر خشک گزرتا ہے، رواں ماہ میں سندھ میں ہونے والی بارش غیر معمولی موسمی سرگرمی ہے۔
