اسلام آباد: صدر مملکت آصف علی زرداری نے کہا ہے کہ بھارت کے حالیہ اقدامات سے علاقائی امن و استحکام کو شدید خطرہ لاحق ہے۔ ایوان صدر میں پاکستان میں چین کے سفیر چیانگ زئے ڈونگ سے ملاقات کے دوران انہوں نے پاکستان اور بھارت کے درمیان موجودہ صورتحال اور حالیہ پہلگام واقعے کے بعد کی صورت حال پر بات کی۔
صدر زرداری نے بھارت کے غیر ذمہ دارانہ اور جارحانہ بیانات پر تشویش کا اظہار کرتے ہوئے کہا کہ ان اقدامات سے خطے میں امن کا خطرہ ہے۔ انہوں نے چین کے ساتھ پاکستان کے تعلقات کو سراہا اور مشکل وقت میں چین کی مسلسل حمایت کا شکریہ ادا کیا۔چینی سفیر نے اس ملاقات میں دونوں ممالک کے درمیان پائیدار اور آزمودہ دوستی کی اہمیت پر زور دیتے ہوئے کہا کہ چین اور پاکستان "آہنی برادر” ہیں، جو ہمیشہ ایک دوسرے کا ساتھ دیتے ہیں، خاص طور پر مشکل حالات میں۔ انہوں نے پاکستان کے موقف کو چین کے ساتھ شیئر کرنے پر صدر مملکت کا شکریہ ادا کیا اور یہ بھی کہا کہ چین جنوبی ایشیا میں امن و استحکام کے لیے پاکستان کی حمایت جاری رکھے گا۔
