اسلام آباد:اسلام آباد کے سیکٹر ای 11 زمین خرد برد کے معاملے پر نیب تحقیقات کیخلاف کیس کی سماعت کیلئے اسلام آباد ہائیکورٹ میں تشکیل دیا گیا ڈویژنل بنچ تحلیل ہوگیا۔
بنچ کے رکن جسٹس انعام امین منہاس نے کیس سننے سے معذرت کر لی۔ذرائع کے مطابق جسٹس انعام امین منہاس ماضی میں اس مقدمے کے درخواست گزار کے وکیل رہ چکے ہیں، جس بناء پر انہوں نے مفاد کے ٹکراؤ سے بچنے کیلئے خود کو سماعت سے علیحدہ کر لیا۔کیس کی سماعت جسٹس ارباب محمد طاہر اور جسٹس انعام امین منہاس پر مشتمل بینچ نے کرنی تھی، بنچ ٹوٹنے کے بعد کیس کی فائل نیا بنچ تشکیل دینے کیلئے قائم مقام چیف جسٹس کو بھجوا دی گئی ہے، نئے بنچ کی تشکیل کے بعد کیس کی سماعت دوبارہ مقرر کی جائے گی۔یاد رہے کہ نیب نے اس کیس میں زمین خرد برد کے الزامات پر ریفرنس احتساب عدالت میں دائر کر رکھا ہے۔
