واشنگٹن: امریکی صدر ڈونلڈ ٹرمپ نے پاکستان اور بھارت کے درمیان کشیدگی کے خاتمے کو خوش آئند قرار دیتے ہوئے کہا ہے کہ فیلڈ مارشل سید عاصم منیر نے حالات کو جنگ کی طرف جانے سے روک کر اہم ذمہ داری نبھائی۔
وائٹ ہاؤس میں میڈیا سے بات کرتے ہوئے امریکی صدر نے کہا، ’’آج مجھے فیلڈ مارشل عاصم منیر سے ملاقات کا اعزاز حاصل ہوا۔ میں نے انہیں خصوصی طور پر مدعو کیا تاکہ ان کا شکریہ ادا کر سکوں کہ وہ کشیدگی کو بڑھنے سے روکنے میں کامیاب رہے۔‘‘صدر ٹرمپ نے کہا کہ پاکستان اور بھارت دونوں ایٹمی قوتیں ہیں، ایسے میں ہر قدم احتیاط اور تدبر سے اٹھانا ضروری ہے۔ انہوں نے اعتراف کیا کہ پاکستانی قیادت نے ذمہ دارانہ رویہ اپنایا۔
ٹرمپ کا کہنا تھا، ’’پاکستانی عوام نہایت ذہین ہیں اور میں انہیں پسند کرتا ہوں۔‘‘ انہوں نے مزید کہا کہ پاکستان، ایران کی صورتِ حال سے بہتر واقف ہے، اسی لیے انہوں نے ایرانی تنازع پر پاکستانی حکام سے بھی تبادلہ خیال کیا۔صدر ٹرمپ نے اس موقع پر یہ بھی کہا کہ پاکستان کے ساتھ تجارتی روابط مضبوط بنانے پر بات چیت جاری ہے، اور مستقبل میں دونوں ممالک کے تعلقات مزید مستحکم ہو سکتے ہیں۔
