اسلام آباد: پاکستان میں تعینات چینی سفیر جیانگ زائیڈونگ نے کہا ہے کہ پاکستان اور چین گہرے دوست اور شراکت دار ہیں، اور دونوں ممالک پاک-چین اقتصادی راہداری (سی پیک) کو مزید وسعت دینے کے لیے پرعزم ہیں۔
اسلام آباد میں ایک سیمینار سے خطاب کرتے ہوئے چینی سفیر نے کہا کہ سی پیک دونوں ممالک کے درمیان معاشی تعاون کی علامت ہے اور اسے ترقی دے کر خطے کے دوسرے ممالک کو بھی فائدہ پہنچایا جا سکتا ہے۔انہوں نے بتایا کہ گزشتہ برس چین نے پاکستان کو 20 ہزار ہیلتھ کٹس فراہم کی تھیں، جب کہ اس سال یہ تعداد 50 ہزار تک بڑھا دی گئی ہے۔ انہوں نے عالمی ترقیاتی اقدام (GDI) کا حوالہ دیتے ہوئے کہا کہ اس کا مقصد مشترکہ خوشحالی ہے۔
چینی سفیر کے مطابق چین اور پاکستان نے مختلف شعبوں میں کئی ترقیاتی منصوبے کامیابی سے مکمل کیے ہیں۔ انہوں نے حالیہ بجٹ کے اعداد و شمار کا حوالہ دیتے ہوئے کہا کہ پاکستان کی معیشت ترقی کی راہ پر گامزن ہے اور اس کے اثرات عوام تک پہنچ رہے ہیں۔جیانگ زائیڈونگ نے مزید کہا کہ دونوں ممالک کے درمیان تجارت میں پچھلے عشرے کے دوران نمایاں اضافہ ہوا ہے، اور مستقبل میں یہ تعاون مزید بڑھے گا۔ ان کا کہنا تھا کہ چین وسطی ایشیائی ممالک کے طلبا کے لیے تعلیمی وظائف میں بھی اضافہ کرے گا۔
