اسلام آباد:نیشنل ڈیزاسٹر مینجمنٹ اتھارٹی (این ڈی ایم اے) نے 20 جون سے 23 جون کے دوران ممکنہ بارشوں اور تیز آندھی کے حوالے سے ایک اہم موسمی ایڈوائزری جاری کی ہے۔
ایڈوائزری کے مطابق، بالائی اور وسطی علاقوں میں بارش کا امکان ہے، جن میں گلگت بلتستان اور آزاد کشمیر شامل ہیں، جبکہ پنجاب اور خیبر پختونخوا کے مختلف حصوں میں بھی تیز ہواؤں، گرج چمک اور بارش کی پیشگوئی کی گئی ہے۔این ڈی ایم اے نے خبردار کیا ہے کہ آندھی اور تیز ہوائیں کمزور دیواروں، بجلی کے کھمبوں، درختوں اور بل بورڈز کو نقصان پہنچا سکتی ہیں۔ عوام کو مشورہ دیا گیا ہے کہ ایسے موسم کے دوران کھلی جگہوں اور ناپائیدار تعمیرات سے دور رہیں۔
شہریوں کو ہدایت کی گئی ہے کہ وہ اپنی گاڑیاں محفوظ اور چھت والی جگہوں پر پارک کریں۔ ایڈوائزری میں مزید کہا گیا ہے کہ آندھی کے دوران حدِ نگاہ کم ہو سکتی ہے، جو ٹریفک حادثات کا باعث بن سکتی ہے، اس لیے ڈرائیونگ میں احتیاط برتی جائے۔این ڈی ایم اے نے عوام سے اپیل کی ہے کہ وہ موسمی صورتِ حال پر نظر رکھیں اور احتیاطی تدابیر پر عمل کریں تاکہ کسی بھی ممکنہ نقصان سے بچا جا سکے۔
