استنبول :استنبول میں جاری اسلامی تعاون تنظیم (او آئی سی) کے وزرائے خارجہ کے دو روزہ اجلاس میں ترک صدر رجب طیب اردوان نے امت مسلمہ کے اتحاد کی اہمیت پر زور دیتے ہوئے کہا ہے کہ یہ وقت امت کے لیے نہایت حساس اور فیصلہ کن ہے۔ انہوں نے اسرائیل کو مشرق وسطیٰ میں عدم استحکام کی سب سے بڑی وجہ قرار دیا اور کہا کہ اسرائیل نے غزہ میں ظلم و ستم کا بازار گرم کر رکھا ہے۔
صدر اردوان نے کہا کہ اسرائیل کی نسل کشی کی پالیسی پورے خطے کو جنگ کی لپیٹ میں لے جا رہی ہے اور اسرائیل ایک دہشت گرد ریاست بن چکا ہے جو عالمی قوانین کی خلاف ورزی کر رہا ہے۔ انہوں نے امت مسلمہ کو متحد ہو کر اسرائیلی ظلم کے خلاف آواز بلند کرنے کا کہا اور فوری جنگ بندی کا مطالبہ کیا۔چیئرمین او آئی سی نے ایران اور اسرائیل کے درمیان کشیدگی کے خاتمے اور مذاکرات کے ذریعے مسائل کے حل پر زور دیا ہے۔ اجلاس میں پاکستان کی نمائندگی نائب وزیراعظم و وزیر خارجہ سینیٹر اسحاق ڈار کر رہے ہیں، جو اجلاس میں پاکستان کے مؤقف کو پیش کریں گے۔
اجلاس کے دوران سعودی وزیر خارجہ شہزادہ فیصل بن فرحان سمیت دیگر اہم شخصیات بھی کلیدی خطاب کریں گی اور اجلاس کی سائیڈ لائنز پر اہم دو طرفہ ملاقاتیں متوقع ہیں۔
