بیجنگ/اسلام آباد: قومی سلامتی کے مشیر لیفٹیننٹ جنرل (ر) محمد عاصم ملک نے چین کے دورے کے دوران چینی قیادت سے اہم ملاقاتیں کیں، جن میں دوطرفہ سیکیورٹی تعاون کو مزید مضبوط بنانے پر اتفاق کیا گیا۔
لیفٹیننٹ جنرل (ر) عاصم ملک شنگھائی تعاون تنظیم (SCO) کی سلامتی کونسل کے سیکرٹریز کے اجلاس میں پاکستان کی نمائندگی کر رہے تھے۔ اجلاس کے دوران انہوں نے عالمی اور علاقائی سیکیورٹی صورتحال پر پاکستان کے مؤقف کو اجاگر کیا اور امن و استحکام کے لیے ملک کے پُرامن کردار کا اعادہ کیا۔مشیر قومی سلامتی نے خطے میں پرامن ہمسائیگی کی پاکستانی خواہش کا اظہار کرتے ہوئے کہا کہ پاکستان باہمی اعتماد، تعاون اور مذاکرات پر یقین رکھتا ہے۔ان کے اس دورے کو پاکستان اور چین کے درمیان بڑھتے ہوئے اسٹریٹجک تعلقات کا تسلسل قرار دیا جا رہا ہے، خاص طور پر ایسے وقت میں جب خطے میں سیکیورٹی چیلنجز بڑھتے جا رہے ہیں۔
