اسلام آباد: صدرِ مملکت آصف علی زرداری نے کہا ہے کہ منشیات اور نشہ آور اشیاء نوجوان نسل کے مستقبل کو تباہ کر رہی ہیں، ان کے خاتمے کے لیے مربوط اور مؤثر اقدامات وقت کی اہم ضرورت ہیں۔
منشیات کے غلط استعمال اور غیر قانونی اسمگلنگ کے خلاف عالمی دن کے موقع پر جاری کردہ پیغام میں صدر مملکت نے اس عزم کا اعادہ کیا کہ معاشرے کو منشیات سے پاک بنانے کے لیے ہر سطح پر کوششیں جاری رکھی جائیں گی۔انہوں نے کہا کہ منشیات کی روک تھام کے لیے بین الاقوامی سطح پر مسلسل اور مشترکہ تعاون ناگزیر ہے۔ منشیات کا پھیلاؤ صرف ایک ملکی مسئلہ نہیں بلکہ ایک عالمی چیلنج بن چکا ہے، جس سے نمٹنے کے لیے مؤثر حکمت عملی اور تعاون درکار ہے۔صدر زرداری کا کہنا تھا کہ پاکستان کی حکومت اس مسئلے کے حل کے لیے پُرعزم ہے۔ وزارت داخلہ اور انسداد منشیات فورس (ANF) اس حوالے سے کلیدی کردار ادا کر رہے ہیں۔ انہوں نے کہا کہ ایک صحت مند، محفوظ اور خوشحال پاکستان کی تشکیل میں ہم سب کو اپنا کردار ادا کرنا ہوگا۔
