اسلام آباد: صدر مملکت آصف علی زرداری نے ہجری سال 1447ھ کے آغاز پر پاکستانی قوم اور امت مسلمہ کو دل کی گہرائیوں سے مبارکباد دی ہے۔ اپنے پیغام میں انہوں نے دعا گو ہوتے ہوئے کہا کہ یہ نیا سال پاکستان کے لیے امن، خوشحالی اور استحکام لے کر آئے۔
آصف علی زرداری نے مزید کہا کہ ہجری سال کا یہ مہینہ اسلامی مہینوں میں سے ایک با حرمت مہینہ ہے، جس میں اللہ تعالیٰ نے ہر قسم کے انتشار اور لڑائی جھگڑے سے بچنے کی ہدایت دی ہے۔ انہوں نے امت مسلمہ کو نیکی اور بندگی کے کاموں میں مشغول رہنے کی ترغیب دیتے ہوئے کہا کہ یہ مقدس مہینہ ہمیں اپنی انفرادی زندگی کو اجتماعی شعور سے جوڑنے کی تعلیم دیتا ہے۔صدر مملکت نے اس موقع پر کہا کہ ہمیں اپنے معاشرتی، معاشی اور سماجی چیلنجز کے مقابلے کے لیے اتحاد، اخوت اور قومی یکجہتی کے اصولوں کو اپنانا ہوگا۔ ان کا کہنا تھا کہ محرم کا مہینہ ہمیں امام حسینؓ کے نقش قدم پر چلنے کا درس دیتا ہے، اور جذبہ کربلا ہمیں فرقہ واریت اور مایوسی سے باہر نکالتا ہے۔
صدر زرداری نے دعا کرتے ہوئے کہا کہ اللہ تعالیٰ یہ سال پاکستان کے لیے خیر، امن اور ترقی کا پیغام لے کر آئے اور ملک کو ہر آفت، مصیبت اور انتشار سے محفوظ رکھے۔ ان کا یہ بھی کہنا تھا کہ دعا ہے کہ یہ سال ملت اسلامیہ اور انسانیت کے لیے خوشحالی کا سال بنے۔
