دبئی: انٹرنیشنل کرکٹ کونسل (آئی سی سی) ایک روزہ اور ٹی 20 فارمیٹ کے لیے وائیڈ بال کے قانون میں تبدیلی کے لیے ایک ٹرائل کرنے جا رہی ہے جو گیند پھینکنے سے قبل بیٹرز کے جگہ بدلنے کی صورت میں باؤلرز کی مدد کرے گی۔
مذکورہ قانون میں امپائر کی جانب سے وائیڈ کا تعین کرنے کے لیے ریفرنس پوائنٹ پر توجہ رکھی گئی ہے۔آئی سی سی کی جانب سے جاری ہونے والی پریس ریلیز میں بتایا گیا ہے کہ گیند پھینکے جاتے وقت بیٹر کی ٹانگوں کی پوزیشن کو اب وائیڈ کے لیے بطور ریفرنس استعمال کیا جائے گا، چاہے بیٹر بعد میں آف سائیڈ کی جانب چلا جائے۔پریس ریلیز میں یہ بھی بتایا گیا ہے کہ ٹرائل میں دیکھا جائے گا گیند جب لیگ سٹمپ اور پروٹیکٹڈ ایریا مارکر کے درمیان پوپنگ کریز سے گزرے تو اسے وائیڈ قرار نہ دیا جائے، اس حوالے سے مدد کے لیے پروٹیکٹڈ ایریا مارکر لائن کو پوپنگ کریز تک بڑھا دیا جائے گا تاکہ یہ امپائر کی رہنمائی کر سکے۔
عملاً اس کا مطلب ہے کہ بیٹر گیند کے پھینکے جاتے وقت جہاں بھی کھڑا ہوگا وہاں سے اس جگہ تعین کیا جائے گا جس کو وائیڈ قرار دیا جا سکے بالخصوص لیگ سائیڈ پر۔اس گیند کو وائیڈ قرار نہیں دیا جائے گا جو لیگ سٹمپ سے دور پھینکی جائے لیکن وہ پروٹیکٹڈ ایریا مارکر لائن کے اندر ہو (جو کہ پچ پر وائیڈ کے عمومی نشانات اور لیگ سٹمپ کے درمیان ہوتے ہیں) لیکن لیگ سٹمپ کی جانب ہو۔قانون میں یہ تبدیلی بیٹرز کے جگہ بدلنے کی وجہ سے وائیڈ گیندوں کی زیادتی کو روکنے میں مدد دے گی۔
