اسلام آباد: چیئرمین پاکستان تحریکِ انصاف (پی ٹی آئی) بیرسٹر گوہر علی خان نے کہا ہے کہ سپریم کورٹ کے فیصلے کے بعد ہمارے تمام ارکان سنی اتحاد کونسل کے نمائندے تصور ہوں گے اور انہیں آزاد امیدوار قرار دینا درست نہیں ہوگا۔
نیوز کانفرنس سے خطاب میں بیرسٹر گوہر نے کہا کہ "ہم نے الیکشن کمیشن کو تین دن کے اندر تمام ضروری دستاویزات فراہم کیں، جس کے بعد ہمارے 86 ارکان کا نوٹیفکیشن جاری ہوا۔ اب کسی کو ابہام نہیں ہونا چاہیے کہ ہمارے ایم این ایز اور ایم پی ایز آزاد نہیں بلکہ سنی اتحاد کونسل کے پلیٹ فارم سے ہیں۔”انہوں نے الزام لگایا کہ مخصوص نشستوں پر دیگر جماعتوں کو ان کی جیتی ہوئی نشستوں سے بھی زیادہ حصے دیے گئے جو انتخابی انصاف کے تقاضوں کے منافی ہے۔
بیرسٹر گوہر کا کہنا تھا کہ انصاف کا حصول آج کے پاکستان میں اتنا مشکل ہے جتنا 1996 میں بھی نہ تھا، لیکن ہم اپنی جمہوری جدوجہد جاری رکھیں گے۔ انہوں نے کہا کہ 26ویں آئینی ترمیم سے متعلق فیصلے کو مقدم رکھا جاتا تو موجودہ صورت حال مختلف ہو سکتی تھی۔
