اسلام آباد: وزیر داخلہ محسن نقوی اور وزیر مملکت برائے داخلہ طلال چودھری نے اسلام آباد میں 14 برس سے زیر التوا ماڈل جیل کا دورہ کیا اور تعمیراتی کاموں پر پیشرفت کا جائزہ لیا۔ دونوں رہنماؤں نے زیر تعمیر جیل کے مختلف حصوں کا معائنہ کیا اور پراجیکٹ کی تکمیل کے حوالے سے اہم فیصلے کیے۔
وزیر داخلہ محسن نقوی نے پراجیکٹ کے پہلے مرحلے کو رواں سال مکمل کرنے کی ڈیڈ لائن دے دی اور کہا کہ تعمیراتی کاموں کو ہر صورت مقررہ وقت پر مکمل کیا جائے گا۔ پہلے مرحلے میں ماڈل جیل میں 1500 قیدیوں کی گنجائش ہوگی، اور جیل میں 90 دن کے اندر دو مزید بیرکوں کی تعمیر کی ہدایت بھی کی گئی ہے۔محسن نقوی نے اس بات پر زور دیا کہ جیل میں 34 بستروں پر مشتمل ہسپتال اور مین کچن کو جلد از جلد مکمل کیا جائے۔ مزید یہ کہ ڈی آئی جی اسلام آباد پولیس کو سٹاف کی تعیناتی کے لیے پلان پیش کرنے کی ہدایت دی گئی۔
ماڈل جیل کی تعمیر کا منصوبہ 2011 میں شروع کیا گیا تھا، مگر مختلف وجوہات کی بنا پر یہ کئی سالوں تک تعطل کا شکار رہا۔ اس موقع پر وفاقی سیکرٹری داخلہ، ڈی آئی جی اسلام آباد پولیس، ڈپٹی کمشنر، اے ڈی سی جی، سی ڈی اے حکام، کنٹریکٹرز اور کنسلٹنٹس بھی موجود تھے۔
