واشنگٹن : امریکی صدر ڈونلڈ ٹرمپ نے دعویٰ کیا ہے کہ اسرائیل غزہ میں 60 روزہ جنگ بندی پر راضی ہو گیا ہے۔ اپنے ایک سوشل میڈیا پیغام میں ٹرمپ نے کہا کہ اس دوران تمام فریقین کے ساتھ مل کر جنگ کے خاتمے کے لیے اقدامات کیے جائیں گے۔
ٹرمپ نے مزید کہا کہ ان کے نمائندوں کی اسرائیلی حکام کے ساتھ غزہ کی صورتحال پر ایک طویل اور نتیجہ خیز ملاقات ہوئی ہے۔ ان کا یہ بھی کہنا تھا کہ امید ہے حماس اس معاہدے کو قبول کرے گی، لیکن اگر ایسا نہ ہوا تو صورتحال مزید پیچیدہ ہو سکتی ہے۔قبل ازیں، ٹرمپ نے میڈیا سے بات کرتے ہوئے کہا تھا کہ وہ توقع کرتے ہیں کہ غزہ میں اگلے ہفتے تک جنگ بندی تک پہنچ سکتے ہیں۔ انہوں نے اس بات کی تصدیق کی کہ اسرائیلی وزیراعظم نیتن یاہو 7 جولائی کو امریکا کا دورہ کریں گے اور ان سے ملاقات کریں گے۔اگر یہ جنگ بندی کامیاب ہوتی ہے تو یہ خطے میں اہم پیش رفت تصور کی جائے گی، لیکن اس کا دارومدار حماس کے ردعمل پر ہوگا۔
