اسلام آباد: وزیراعلیٰ خیبرپختونخوا علی امین گنڈاپور نے مخالفین کو دو ٹوک پیغام دیتے ہوئے کہا ہے کہ ان کی حکومت کو آئینی طریقے سے ہٹانا ممکن نہیں، اور اگر ایسا ہو گیا تو وہ سیاست کو خیر باد کہہ دیں گے۔
اسلام آباد میں پی ٹی آئی کی پارلیمانی پارٹی کے اجلاس کے بعد پریس کانفرنس کرتے ہوئے علی امین گنڈاپور کا کہنا تھا کہ آج کا اجلاس اتحاد، اعتماد اور ثابت قدمی کا مظہر تھا۔ انہوں نے کہا کہ جو لوگ پی ٹی آئی کو تقسیم کرنے کی خواہش رکھتے ہیں، وہ خام خیالی میں مبتلا ہیں، کیونکہ پارٹی مکمل طور پر متحد ہے۔وزیراعلیٰ نے الزام لگایا کہ ان کی حکومت کے خلاف سازشیں کی جا رہی ہیں، لیکن بغیر سازش کے ان کی حکومت گرانا ناممکن ہے۔ ان کا کہنا تھا، "مجھے پورے ملک میں گھما کر دباؤ ڈالا گیا کہ میں پی ٹی آئی چھوڑ دوں، لیکن میں ڈٹا رہا۔”
انہوں نے مزید کہا کہ 9 مئی کا واقعہ ایک بہانہ ہے، اصل نشانہ پارٹی کا بانی ہے، جس سے اختیارات اور قیادت چھیننے کی کوشش کی جا رہی ہے۔ "ہمارا مینڈیٹ چوری کیا گیا، مخصوص نشستیں چھینی گئیں، اور 26ویں آئینی ترمیم عدالتی نظام پر ایک بدنما داغ ہے،” انہوں نے کہا۔علی امین گنڈاپور نے واضح کیا کہ پارٹی کی حکمت عملی اور فیصلوں کا اختیار اب بھی بانی پی ٹی آئی کے پاس ہے، اور وہ جب چاہیں حکومت ختم کرنے کا فیصلہ کر سکتے ہیں۔
