شوشا: وزیراعظم شہباز شریف نے اقتصادی تعاون تنظیم (ECO) کے سربراہی اجلاس کے موقع پر ایرانی صدر مسعود پزشکیان سے ملاقات کی، جس میں دونوں رہنماؤں نے پاکستان اور ایران کے درمیان تمام شعبوں میں تعاون کے فروغ پر تبادلہ خیال کیا۔
دونوں رہنماؤں نے گزشتہ ملاقاتوں کے فیصلوں پر ہونے والی پیشرفت کو قابل اطمینان قرار دیا اور دوطرفہ تعلقات کو مزید مضبوط بنانے کے عزم کا اعادہ کیا۔ ملاقات میں اسرائیل کی بلاجواز جارحیت کے تناظر میں علاقائی صورتحال پر بھی غور کیا گیا۔وزیراعظم نے ایرانی صدر کی حالیہ بحران کے دوران قیادت اور جنگ بندی کے فیصلے کو سراہا، اور ایران کے عوام و حکومت کے ساتھ پاکستان کی غیر متزلزل یکجہتی کا اعادہ کیا۔ایرانی صدر نے تنازع کو کم کرنے میں پاکستان کے مثبت کردار اور سفارتی حمایت پر شکریہ ادا کیا۔ وزیراعظم نے ایرانی سپریم لیڈر کے لیے نیک خواہشات اور مبارکباد کا پیغام بھی پہنچایا۔
