اسلام آباد: حکومت نے اس بار حج سے محروم رہ جانے والے 60 ہزار سے زائد عازمین حج کو آئندہ حج کے لیے ترجیح دینے کا فیصلہ کیا ہے۔
تفصیلات کے مطابق گزشتہ روز قومی اسمبلی کی قائمہ کمیٹی برائے مذہبی امور کا اجلاس چیئر مین ملک عامر ڈوگر کی زیر صدارت ہوا جس میں وفاقی وزیر مذہبی امور سردار یوسف سمیت دیگر شریک ہوئے۔جلاس میں عامر ڈوگر نے وزارت مذہبی امور کو ہدایت کی ہے کہ جو 67 ہزار پرائیویٹ عازمین رہ گئے تھے ان کا مستقبل میں مسئلہ حل کیا جائے، ان کے حج واجبات واپس کیے جائیں اور انہیں حج 2026 میں اکاموڈیٹ کیا جا ئے۔
اس پر وفاقی وزیر مذہبی امور نے کمیٹی کو بتایا کہ نجی حج اسکیم کے فریضہ حج سے محروم رہ جانے والے 63 ہزار عازمین کے 365 ملین ریال سعودی عرب میں پڑے ہیں، نجی حج ٹورآپریٹرز کی تنظیم چاہتی ہے کہ جو افراد گزشتہ سال حج کی سعادت سے محروم رہ گئے ان کو آئندہ سال ترجیح دی جائے۔
سردار یوسف نے مزید کہا کہ حج 2026کے لیے 4 لاکھ 55 ہزار عازمین حج نے رجسٹریشن کرائی ہے، وزیراعظم نے بھی ان عازمین کو اگلے سال ترجیح دینے کی ہدایت کی ہے، وزیر اعظم کی طرف سے بنائی گئی تحقیقاتی کمیٹی کی رپورٹ تیار ہوجائے تو وہ کمیٹی میں پیش کردیں گے۔اجلاس کے دوران کمیٹی نے بھارت، بنگلا دیش اور ایران سمیت پاکستان کے قریبی ممالک کے حج اخراجات پر تقابلی بریفنگ طلب کر لی۔
اس موقع پر وزارت مذہبی امور کے حکام نے قائمہ کمیٹی کو بتایا کہ حج سستا کرنے کے لیے بحری جہاز کے ذریعے حج کرانے کی کوشش ہے، کہ وزیر داخلہ اور سیکرٹری مذہبی امور ان دنوں تہران میں ہیں، بحری جہاز کے ذریعے حج کرانے کا ممکنہ حل زیر غور ہے، ایک تجویز یہ بھی آرہی ہے کہ حاجیوں کی رہائش کے لیے اگر پرتعیش عمارتیں حاصل نہ کی جائیں تو حج اور بھی سستا ہو سکتا ہے۔
