واشنگٹن :پاکستان کے نائب وزیراعظم اسحاق ڈار نے کہا ہے کہ پاکستان کے چین کے ساتھ تعلقات انتہائی مضبوط ہیں اور دونوں ممالک "آئرن برادر” ہیں۔
انہوں نے کہا کہ پاکستان امریکہ کے ساتھ بھی بہترین تعلقات چاہتا ہے اور صدر ٹرمپ کے پاکستان کے دورے کا خیرمقدم کیا جائے گا۔ اسحاق ڈار نے مزید کہا کہ اگر امریکہ کشمیر تنازعہ کے حل کے لیے ثالثی کرے تو پاکستان بھارت سے مذاکرات کے لیے تیار ہے۔العربیہ ٹی وی کو دیے گئے انٹرویو میں اسحاق ڈار نے اس بات پر زور دیا کہ پاکستان امن پسند ملک ہے اور کسی بھی ملک سے جارحیت کی خواہش نہیں رکھتا، مگر ان کے مطابق، "تالی ایک ہاتھ سے نہیں بجتی”۔ انہوں نے کہا کہ مسئلہ کشمیر کا حل اقوام متحدہ کی قراردادوں کے مطابق ہونا چاہیے تاکہ جنوبی ایشیا میں پائیدار امن قائم ہو سکے۔
نائب وزیراعظم نے پاکستان کے سعودی عرب، یو اے ای اور قطر کے ساتھ انتہائی دوستانہ تعلقات کو بھی سراہا اور ایران اسرائیل تنازعہ کے حل کے لیے پاکستان کی سفارتی حمایت کا اعادہ کیا۔ اس کے علاوہ، اسحاق ڈار نے فلسطین کے دو ریاستی حل کو خطے میں امن کا واحد راستہ قرار دیا اور کہا کہ پاکستان عالمی سطح پر مسئلہ کشمیر اور فلسطین کے حل کے لیے او آئی سی اور اقوام متحدہ جیسے فورمز سے عملی اقدامات کی توقع رکھتا ہے۔
اسحاق ڈار نے فرانس اور سعودی عرب کے زیر اہتمام فلسطین کے دو ریاستی حل سے متعلق ہونے والی کانفرنس کو پاکستان کی مکمل حمایت کا یقین دلاتے ہوئے کہا کہ فلسطین کو تسلیم کرنے والے ممالک کی تعداد بڑھنی چاہیے۔ان کے مطابق، مسئلہ کشمیر کا حل نہ صرف جنوبی ایشیا کے لیے بلکہ عالمی امن کے لیے بھی ضروری ہے، اور اگر اس مسئلے کا حل نکلے تو خطے میں بے پناہ معاشی امکانات کھل سکتے ہیں۔
