اسرائیلی فوج نے اٹلی سے روانہ ہونے والی امدادی کشتی ‘حنظلہ’ کو غزہ پہنچنے سے پہلے ہی روک دیا اور کشتی کو قبضے میں لے لیا۔
اسرائیلی فوج نے اب سے چند لمحوں قبل غزہ تک امداد لے جانے کی کوشش کرنے والی ایک اور کشتی ‘حنظلہ’ پر حملہ کیا اور اسے پر قبضہ کرلیا۔کشتی کے منتظمین کی جانب سے چلائی جانے والی لائیو ویڈیو میں اسرائیلی فوجیوں کو زبردستی کشتی پر چڑھتے دیکھا گیا جس کے کچھ دیر بعد براہ راست نشریات بند ہوگئیں۔
اسرائیلی فوجیوں کی جانب سے کشتی پر قبضے سے کچھ دیر قبل کشتی پر سوار ایک خاتون رکن اِما فوریو (Emma Fourreau) نے اپنی ایکس پوسٹ میں لکھا تھا کہ ‘اسرائیلی فوج پہنچ گئی ہے، ہم اپنے فون سمندر میں پھینک رہے ہیں، غزہ میں قتل عام بند کرو’۔
غزہ تک امداد لے جانے والا یہ مشن فریڈم فلوٹیلا کولیشن (Freedom Flotilla Coalition) کے زیر انتظام سرانجام دیا جارہا تھا۔یاد رہے کہ گزشتہ ماہ بھی میڈلین نامی امدادی کشتی غزہ کے لیے امدادی سامان لے کر روانہ ہوئی تھی تاہم اسرائیلی فوج نے غزہ سے تقریبا 200 کلو میٹر کی دوری پر اس کشتی کا راستہ روک کر اسے واپس بھیج دیا تھا۔
