لاہور: بھارتی پنجابی فلم ’سردار جی تھری‘ کی عالمی سطح پر شاندار کامیابی کے بعد معروف پاکستانی اداکارہ ہانیہ عامر کے اعزاز میں ایک خصوصی تقریب کا اہتمام کیا گیا، جس میں شوبز انڈسٹری کی متعدد نامور شخصیات شریک ہوئیں۔
یہ پارٹی ہانیہ کی قریبی دوست مائدہ نے منعقد کی، جس کا مقصد فلم کی کامیابی کا جشن منانا تھا۔ تقریب میں ہمایوں سعید، اُشنا شاہ، یاسر حسین، سونیا حسین، عائشہ عمر، یشما گل، مومل شیخ، کومل عزیز سمیت دیگر فنکاروں نے شرکت کی۔
تقریب میں ہانیہ عامر کو دیگر فنکاروں کے ساتھ خوشگوار لمحات شیئر کرتے، ڈانس کرتے اور محبت بھرے انداز میں تصاویر بنواتے ہوئے دیکھا گیا۔ سوشل میڈیا پر ان خوشیوں بھرے لمحات کی جھلکیاں خوب وائرل ہو رہی ہیں۔
فلم 27 جون 2025 کو پاکستان سمیت دنیا بھر میں ریلیز ہوئی تھی۔ رپورٹس کے مطابق فلم نے بین الاقوامی سطح پر 63 کروڑ روپے جبکہ صرف پاکستان میں 31 کروڑ روپے کا بزنس کیا، جس نے ’سردار جی تھری‘ کو پاکستان میں سب سے زیادہ کمائی کرنے والی بھارتی پنجابی فلم بنا دیا , یہاں تک کہ اس نے مقبول فلم ’کیری آن جٹا تھری‘ کو بھی پیچھے چھوڑ دیا۔فلم ایک کامیڈی اور ہارر عناصر پر مبنی کہانی ہے، جس میں ہانیہ عامر اور دلجیت دوسانجھ کو بھوتوں کے تعاقب میں دکھایا گیا ہے۔
