جنیوا :سپیکر قومی اسمبلی سردار ایاز صادق نے جنیوا میں ہونے والی چھٹی عالمی سپیکرز کانفرنس کے موقع پر ایران کے اسپیکر ڈاکٹر محمد باقر قالیباف سے ملاقات کی۔ دونوں رہنماؤں نے پاکستان اور ایران کے درمیان پارلیمانی روابط مزید مضبوط بنانے پر اتفاق کیا۔
ملاقات میں ایرانی سپیکر نے ایران پر اسرائیلی جارحیت کے خلاف پاکستان کی حمایت پر شکریہ ادا کیا۔ایاز صادق نے کہا کہ پاکستان اور ایران کے تعلقات برادرانہ اور تاریخی نوعیت کے ہیں، اور پاکستان ایران کی خودمختاری اور سلامتی کی مکمل حمایت کرتا ہے۔ ان کا کہنا تھا کہ مشرقِ وسطیٰ میں امن، پورے خطے کی ترقی کے لیے ضروری ہے۔
انہوں نے زور دیا کہ ایران پر اسرائیلی حملہ عالمی قوانین کی کھلی خلاف ورزی ہے، اور پاکستان ہمیشہ عالمی تنازعات کا پرامن، مذاکراتی حل چاہتا ہے۔ ایاز صادق نے کہا کہ پاکستان کی پارلیمان نے ایران پر اسرائیلی جارحیت کے خلاف متفقہ قراردادیں منظور کی ہیں۔ایرانی سپیکر قالیباف نے بھی کہا کہ ایران، پاکستان کے ساتھ اپنے قریبی تعلقات کو قدر کی نگاہ سے دیکھتا ہے، اور پاکستانی عوام و پارلیمان کی حمایت کو ایرانی عوام ہمیشہ یاد رکھیں گے۔
