اسلام آباد : ایرانی صدر ڈاکٹر مسعود پزشکیان کل (2 اگست) کو دو روزہ سرکاری دورے پر پاکستان پہنچیں گے۔ یہ دورہ وزیراعظم شہباز شریف کی دعوت پر ہو رہا ہے اور یہ ان کا بطور صدر پہلا دورۂ پاکستان ہوگا۔
ترجمان دفتر خارجہ کے مطابق ایرانی صدر کے ہمراہ وزیر خارجہ عباس عراقچی اور اعلیٰ سطح کا وفد بھی آئے گا۔ اپنے قیام کے دوران وہ صدر آصف علی زرداری سے ملاقات کریں گے، جب کہ وزیراعظم شہباز شریف کے ساتھ وفود کی سطح پر اہم مذاکرات بھی ہوں گے۔دفتر خارجہ نے کہا ہے کہ یہ دورہ دونوں ملکوں کے درمیان قریبی، برادرانہ تعلقات کو مزید مستحکم کرنے میں مدد دے گا۔ یاد رہے کہ وزیراعظم شہباز شریف نے رواں سال 27 مئی کو ایران کا دورہ کیا تھا، جس کے بعد ایرانی صدر کا یہ پہلا باہمی رابطہ ہے۔
