راولپنڈی : پاکستان کی معروف اداکارہ صبا قمر کی شوٹنگ کے دوران اچانک طبیعت بگڑ گئی اور انہیں دل کی تکلیف کے باعث فوری طور پر قائداعظم انٹرنیشنل ہسپتال راولپنڈی منتقل کر دیا گیا۔
میڈیا رپورٹس کے مطابق صبا قمر کو آئی سی یو میں داخل کیا گیا جہاں ڈاکٹروں نے ایمرجنسی میں انجوگرافی سمیت متعدد طبی اقدامات کیے۔ ڈاکٹروں کا کہنا ہے کہ ہسپتال پہنچنے پر ان کی حالت بہت نازک تھی اور فوری علاج نہ ہوتا تو صورت حال سنگین ہو سکتی تھی۔
قریبی ذرائع کے مطابق اداکارہ ایک بڑے پروجیکٹ پر کام کر رہی تھیں جس کی وجہ سے وہ ذہنی دباؤ اور جسمانی تھکن کا شکار تھیں، جس کے باعث ان کی طبیعت خراب ہوئی۔اب صبا قمر کی حالت بہتر ہے اور انہیں ہسپتال سے چھٹی دے دی گئی ہے۔ ڈاکٹروں نے انہیں مکمل آرام اور جسمانی مشقت سے پرہیز کا مشورہ دیا ہے تاکہ وہ جلد صحتیاب ہو سکیں۔اداکارہ کے مداحوں اور شوبز شخصیات نے ان کی جلد صحتیابی کے لیے سوشل میڈیا پر دعاؤں اور نیک خواہشات کا سلسلہ شروع کر دیا ہے۔
