لیہ:اسسٹنٹ کمشنرز حارث حمید خان، محبوب اقبال ہنجرا، چیف ایگزیکٹو افیسر صحت ڈاکٹر شاہد ریاض کی شرکت
لیہ (نیوز رپورٹر) ڈپٹی کمشنر امیرا بیدار نے مریضوں کو بہترین طبی سہولتیں فراہم کرنے کے لیے ایک اہم اجلاس کی قیادت کی، جس میں ضلع بھر کے اہم افسران نے شرکت کی۔ اجلاس میں ایڈیشنل ڈپٹی کمشنر ریوینیو محمد شاہ ملک، اسسٹنٹ کمشنرز حارث حمید خان، محبوب اقبال ہنجرا، چیف ایگزیکٹو افیسر صحت ڈاکٹر شاہد ریاض اور ایم ایس ڈی ایچ کیو ہسپتال لیہ ڈاکٹر غلام محی الدین سمیت دیگر افسران نے بھی حصہ لیا۔
ڈپٹی کمشنر امیرا بیدار نے اجلاس سے خطاب کرتے ہوئے کہا کہ وزیر اعلیٰ پنجاب مریم نواز شریف کے ویژن کے مطابق صحت کے شعبے میں انقلابی اقدامات کیے جا رہے ہیں۔ انہوں نے کہا کہ حکومت پنجاب کا مقصد عوام کو معیاری طبی سہولتیں فراہم کرنا، ہسپتالوں کی حالت بہتر کرنا اور مریضوں کو مفت علاج کی سہولتیں دینا ہے۔ ڈپٹی کمشنر نے اس بات پر زور دیا کہ ہسپتالوں میں آنے والے مریضوں کو تمام بنیادی سہولتیں فراہم کی جائیں اور طبی عملہ ان کے ساتھ حسن سلوک اور پیشہ ورانہ رویہ اختیار کرے۔
انہوں نے مزید کہا کہ ڈاکٹرز اور طبی عملہ اپنی پیشہ ورانہ ذمہ داریوں کو پوری ایمانداری اور محنت سے ادا کریں۔ امیر بیدار نے اس کے ساتھ ہی ہسپتالوں میں ڈاکٹرز کے لباس کی درستگی پر بھی زور دیتے ہوئے کہا کہ موبائل فون کا استعمال صرف ایمرجینسی حالات میں کیا جائے۔ ساتھ ہی، انہوں نے ان کال ڈیوٹی ڈاکٹرز کی مانیٹرنگ کرنے کی بھی ہدایت کی تاکہ مریضوں کو فوری علاج مل سکے۔ انہوں نے اسسٹنٹ کمشنرز، ہیلتھ افسران اور ایم ایس ہسپتالوں کو ہدایت کی کہ وہ ہسپتالوں کی باقاعدہ مانیٹرنگ کریں تاکہ مریضوں کو اعلیٰ معیار کی طبی خدمات فراہم کی جا سکیں۔
یہ اجلاس عوامی صحت کی بہتر سہولتوں کے لیے ایک مثبت قدم ثابت ہو گا اور اس کے ذریعے لیہ کے ہسپتالوں میں معیاری علاج کی فراہمی کو مزید بہتر بنایا جائے گا۔
