لاہور: حکومت پنجاب نے صوبے میں صفائی کے نظام کو بہتر بنانے اور بلدیاتی اداروں کی مالی خودمختاری کو فروغ دینے کے لیے نئی سینیٹیشن فیس عائد کرنے کا فیصلہ کیا ہے۔
ترجمان محکمہ بلدیات پنجاب کے مطابق، یہ صفائی فیس 200 روپے سے لے کر 5000 روپے تک ہوگی۔فیس کا تعین رہائشی اور کمرشل علاقوں کے لحاظ سے کیا جائے گا — رہائشی علاقوں میں فیس نسبتاً کم جبکہ کمرشل علاقوں میں زیادہ مقرر کی جائے گی۔
ترجمان نے مزید بتایا کہ صفائی فیس کی بلنگ کا نظام مکمل طور پر ڈیجیٹل کیا جائے گا۔ ابتدا میں، پہلے دو ماہ تک بلز پرنٹ کی صورت میں گھروں اور دفاتر تک بھیجے جائیں گے، جس کے بعد بتدریج ڈیجیٹل طریقہ کار کو اپنایا جائے گا۔ترجمان کے مطابق، محکمہ بلدیات نے پہلے سال کے دوران 15 ارب روپے کی وصولی کا ہدف مقرر کیا ہے، جو شہری سہولیات کی بہتری اور صفائی کے نظام کی پائیداری میں مددگار ثابت ہوگا۔
