ویسٹ انڈیز کے خلاف پلیئر آف دی میچ کا ایوارڈ حاصل کرنے والے کرکٹر حسن نواز نے کہا ہےکہ ان کی کوشش یہی تھی کہ اپنے ڈیبیو میچ کو یادگار بنانا ہے۔
حسن نواز نے کہا کہ یہ میرا ڈیبیو میچ تھا اور میں نے کہا تھا کہ پلیئر آف دی میچ بن کر اسے یادگار بناتا ہوں۔انہوں نے کہا کہ کپتان محمد رضوان بیٹنگ کے دوران بھی کہتے رہے اور جاتے ہوئے بھی یہی کہا کہ آپ کا ڈیبیو میچ ہے اور میچ ختم کرنا ہے، مجھے اعتماد تھا کہ میں ہٹنگ کر لیتا ہوں، جس طرح پی ایس ایل میں میچز فنش کرتا رہا تو اسی چیز میں کامیابی ملی۔
حسن نواز کا کہنا تھا کہ بارش کی وجہ سے بال گرپ ہو رہا تھا اسی وجہ سے تھوڑا ٹائم لیا، حسین طلعت کے ساتھ یہی پلان بنایا تھا کہ پارٹنرشپ کرنی ہے کیونکہ ہم بڑے ہٹ مار لیتے ہیں، اگر آخر تک جائیں گے تو آسانی سے میچ فنش کر لیں گے۔انہوں نے مزید کہا کہ ڈومیسٹک میں بھی اس طرح کی مشکل پچز پر کھیلے ہوئے ہیں، بابراعظم، رضوان اور سلمان علی آغا سے بہت کچھ سیکھنے کو ملتا ہے، شاہین آفریدی اور نسیم شاہ نے بڑی اچھی بولنگ کی، ہم لوگوں سے مس فیلڈنگ ہوئی جس کا ویسٹ انڈیز نے فائدہ اٹھایا۔
دوسری جانب قومی ٹیم کے کپتان محمد رضوان کا کہنا تھاکہ جیت کا کریڈٹ حسن نواز اور حسین طلعت کو جاتا ہے ، دونوں نے شاندار بیٹنگ کی جب کہ بولنگ میں بہتری کی گنجائش ہے۔
