لاہور : انسداد دہشت گردی عدالت لاہور نے 9 مئی کے جلاؤ گھیراؤ سے متعلق دو مقدمات میں پاکستان تحریک انصاف کے چار سینئر رہنماؤں ڈاکٹر یاسمین راشد، عمر سرفراز چیمہ، میاں محمود الرشید اور اعجاز چوہدری کو 10، 10 سال قید اور 6، 6 لاکھ روپے جرمانے کی سزا سنا دی ہے۔
عدالت نے سزا یافتہ رہنماؤں کے جیل وارنٹ بھی جاری کر دیے ہیں اور ان کی جائیدادیں ضبط کرنے کا حکم دیا ہے۔ یہ مقدمات تھانہ شادمان اور تھانہ سرور روڈ میں درج کیے گئے تھے جن میں ملزمان پر پرتشدد مظاہروں اور عوامی و نجی املاک کو نقصان پہنچانے کے الزامات تھے۔سپرنٹنڈنٹ جیل کو ہدایت کی گئی ہے کہ وہ عدالتی حکم کے مطابق قیدیوں کو جیل منتقل کر کے سزا کا نفاذ یقینی بنائیں۔یہ مقدمات 9 مئی 2023 کے واقعات سے متعلق ہیں، جب چیئرمین پی ٹی آئی کی گرفتاری کے بعد ملک کے مختلف شہروں میں پرتشدد مظاہرے ہوئے تھے، جن میں فوجی تنصیبات اور سرکاری و نجی املاک کو نقصان پہنچایا گیا تھا۔
