اسلام آباد : پاکستان میں معرکہ حق اور یوم آزادی کی مناسبت سے خصوصی تقریبات کا آغاز آج رات 8 بجے جناح سٹیڈیم اسلام آباد میں ہوگا۔ اس تقریب میں صدر مملکت آصف زرداری، وزیراعظم شہباز شریف، وفاقی وزرا اور دیگر اہم شخصیات شریک ہوں گی۔
اس موقع پر فیلڈ مارشل سید عاصم منیر بھی تقریب میں شرکت کریں گے، جبکہ جے ایف 17 تھنڈر طیاروں کا فلائی پاسٹ کا مظاہرہ کیا جائے گا۔ مزید برآں، ملی نغمے اور میوزیکل شو کا انعقاد بھی کیا جائے گا تاکہ لوگوں میں حب الوطنی کا جذبہ اجاگر کیا جا سکے۔
دوسری جانب، تمام اہم سیاسی جماعتوں نے بھی جشن آزادی کی تقریبات کو پروقار طریقے سے منانے کا عہد کیا ہے۔ ان جماعتوں کے قائدین نے عوام سے اپیل کی ہے کہ وہ جشن آزادی کے موقع پر فضول خرچی سے گریز کریں اور اپنی رقوم و عطیات غریب، نادار، یتیموں، مسکینوں اور مستحق افراد کو دیں تاکہ وہ بھی آزادی کے جشن میں شریک ہو سکیں۔
