کوئٹہ: بلوچستان کے مختلف علاقوں میں گزشتہ 24 گھنٹوں کے دوران موسلادھار بارشوں سے نظامِ زندگی متاثر ہوا ہے، جبکہ ہرنائی میں افسوسناک واقعے میں ایک خاتون اور بچہ جاں بحق ہو گئے۔
پی ڈی ایم اے کے مطابق ہرنائی کے علاقے گاچینہ میں شدید بارش کے باعث ایک گھر کی چھت گر گئی، جس کے نتیجے میں دو افراد جاں بحق اور ایک خاتون زخمی ہو گئی۔ اسی علاقے میں سیلابی ریلے میں تین افراد بہہ گئے، جن میں سے دو کو بچا لیا گیا ہے جبکہ ایک بچے کو تلاش کرنے کیلئے ریسکیو آپریشن جاری ہے۔
سوراب میں بارشوں کے باعث 115 سے زائد گھروں کو نقصان پہنچا ہے، جبکہ دیگر علاقوں سے بھی مالی نقصانات کی اطلاعات موصول ہو رہی ہیں۔نیشنل ہائی وے اتھارٹی (NHA) کے مطابق شدید بارشوں کی وجہ سے کچھی کے مقام پر کوئٹہ-سبی شاہراہ کو بند کر دیا گیا ہے۔ بی بی نانی پل کو بھی نقصان پہنچا ہے۔ متعلقہ حکام نے شہریوں سے غیر ضروری سفر سے گریز کرنے کی اپیل کی ہے۔
بارشوں کے بعد ندی نالوں میں طغیانی کے خدشے کے پیش نظر تمام ضلعی اور امدادی محکموں کو الرٹ جاری کر دیا گیا ہے۔ اس دوران ڈیرہ بگٹی میں ایف سی اہلکار عوامی خدمت میں پیش پیش نظر آئے اور متاثرہ شہریوں کی مدد کی۔محکمہ موسمیات نے آئندہ چند گھنٹوں میں مزید بارشوں کی پیش گوئی کی ہے، جن سے خضدار، آواران، لسبیلہ، پسنی، گوادر، پنجگور، کیچ، شیرانی، پشین، قلعہ عبداللہ، بارکھان، ژوب، موسیٰ خیل، مستونگ، لورا لائی اور کوہلو کے علاقوں میں ندی نالوں میں طغیانی کا خدشہ ہے۔
