اسلام آباد : وزیراعظم شہباز شریف نے ملک بھر میں مون سون کی شدید بارشوں اور سیلابی صورتحال کے پیش نظر مختلف سیاسی رہنماؤں سے رابطے کیے۔
انہوں نے چیئرمین پاکستان پیپلز پارٹی بلاول بھٹو زرداری سے بات کی اور کراچی سمیت جنوبی سندھ میں موسلادھار بارشوں، سیلاب اور قیمتی جانوں کے نقصان پر افسوس کا اظہار کیا۔ وزیراعظم نے سندھ حکومت کو ہر ممکن تعاون کی پیشکش کی تاکہ ہنگامی صورتحال سے نمٹا جا سکے۔شہباز شریف نے چیئرمین این ڈی ایم اے کو ہدایت کی کہ وہ سندھ حکومت کے ساتھ رابطے میں رہیں اور صوبائی ڈیزاسٹر مینجمنٹ اتھارٹی کو مکمل معاونت فراہم کریں، ساتھ ہی عوام کو ممکنہ خطرات سے آگاہ کریں۔
وزیراعظم نے امیر جماعت اسلامی حافظ نعیم الرحمان اور وزیرِ وفاقی تعلیم و پیشہ ورانہ تربیت ڈاکٹر خالد مقبول صدیقی سے بھی ٹیلی فون پر بات کی۔ حافظ نعیم الرحمان سے خیبرپختونخوا میں بارشوں کے نقصانات اور امدادی کاموں پر تبادلہ خیال کیا گیا، جبکہ وزیراعظم نے الخدمت فاؤنڈیشن کی امدادی خدمات کی بھی تعریف کی۔ڈاکٹر خالد مقبول صدیقی سے گفتگو میں سندھ میں بارشوں اور سیلابی صورتحال اور متوقع خطرات پر بات ہوئی، اور وزیراعظم نے وفاقی اداروں کی طرف سے مکمل تعاون کی یقین دہانی کرائی۔
