اسلام آباد:وفاقی وزیر داخلہ محسن نقوی نے کہا ہے کہ پاک بھارت سمیت 4 جنگیں رکوا کر امریکی صدر نے انسانیت کی خدمت کی ہے، امید ہے کہ امریکی صدر ڈونلڈ ٹرمپ کی روس یوکرین اور غزہ میں جنگ بندی کی کاوشیں بار آور ہوں گی۔
وفاقی وزیرداخلہ محسن نقوی سے امریکا کی قائم مقام سفیر نیٹلی بیکر نے اہم ملاقات کی، جس میں پاک امریکا تعلقات، انسداد دہشت گردی اور انسداد منشیات کے حوالے سے اشتراک کار پر تبادلہ خیال کیا گیا۔قائم مقام امریکی سفیر نے نشان امتیاز ملنے پر وفاقی وزیر داخلہ محسن نقوی کو مبارکباد دی اور نیک خواہشات کا اظہار کیا۔اس موقع پر نیٹلی بیکر نے پاکستان خصوصاً خیبرپختونخوا میں بارشوں و سیلابی ریلوں کے باعث جانی نقصان پر اظہار افسوس کرتے ہوئے کہا کہ ہماری تمام تر ہمدردیاں جاں بحق افراد کے خاندانوں کے ساتھ ہیں۔
وزیر داخلہ محسن نقوی نے پائیدار عالمی امن کیلئے مخلصانہ اقدامات پر امریکی صدر ڈونلڈ ٹرمپ کی غیر معمولی کاوشوں کو سراہتے ہوئے کہا کہ پاک بھارت سمیت 4 جنگیں رکوا کر امریکی صدر ڈونلڈ ٹرمپ نے انسانیت کی خدمت کی ہے، امید ہے کہ امریکی صدر ڈونلڈ ٹرمپ کی روس یوکرائن اور غزہ میں جنگ بندی کی کاوشیں بار آور ہوں گی۔
محسن نقوی کا کہنا تھا کہ حالیہ تاریخ میں کوئی ایسا لیڈر نہیں جس نے ہزاروں انسانوں کو تباہی سے بچایا ہو، امریکی صدر ڈونلڈ ٹرمپ کے دور میں پاک امریکا تعلقات میں وسعت اور گرمجوشی آئی ہے، پاکستان امن کیلئے اٹھائے ہر قدم کا خیر مقدم کرتا ہے۔قائم مقام امریکی سفیر نے کہا کہ پاکستان ہمارا اہم دوست ملک ہے، پاکستان کے ساتھ تعلقات کو خصوصی اہمیت دیتے ہیں۔
