پشاور : خیبرپختونخوا میں خواتین سے ہراسانی کے واقعات کی روک تھام کیلئے پنک بٹن نصب کرنے کا فیصلہ کیا گیا ہے۔
سینٹرل پولیس آفس کے مطابق پولیس نے خواتین سے ہراسانی کے واقعات کی روک تھام کیلئےصوبے بھرمیں پنک بٹن نصب کرنےکا فیصلہ کیا ہے جس کے تحت پہلے مرحلے میں 68 پنک بٹن پشاور میں نصب کیےجائیں گے جہاں خواتین کی نقل وحرکت زیادہ ہوگی وہاں پنک بٹن لگائےجائیں گے۔
سی پی او کا بتانا ہے کہ پنک بٹن کے ذریعےخواتین اپنی شکایت سے پولیس کو بروقت آگاہ کرسکیں گی، پنک بٹن پولیس کنٹرول روم سے منسلک رہیں گے، اس بٹن کو دبانے سے شکایت کنندہ کی ویڈیو اور آواز کنٹرول روم کو موصول ہوگی۔سینٹرل پولیس آفس کے مطابق خواتین کے علاوہ دیگر شہری بھی اس سہولت سے استفادہ حاصل کرسکیں گے جب کہ پنک بٹن اسٹریٹ کرائم کے واقعات پربروقت رسپانس میں بھی مددگار ثابت ہوگا۔
