کراچی: پاکستان پیٹرولیم لمیٹڈ (پی پی ایل) نے صوبہ پنجاب کے ضلع اٹک میں تیل و گیس کے بڑے ذخائر دریافت کرنے کا اعلان کیا ہے۔ کمپنی کے مطابق یہ دریافت ملک کی توانائی کی ضروریات پوری کرنے میں اہم کردار ادا کرے گی۔
پی پی ایل کے جاری کردہ اعلامیے کے مطابق ضلع اٹک کے علاقے ڈھوک سلطان-03 کنویں سے روزانہ 1469 بیرل تیل اور 2.56 ایم ایم سی ایف (ملین مکعب فٹ) گیس حاصل ہوگی۔ یہ کامیابی کمپنی اور ملک کے لیے ایک اہم سنگ میل قرار دی جا رہی ہے۔
اعلامیے میں مزید کہا گیا کہ یہ تاریخی دریافت نہ صرف پی پی ایل اور اس کے شراکت دار گورنمنٹ ہولڈنگز پرائیویٹ لمیٹڈ (جی ایچ پی ایل) کے لیے بڑی کامیابی ہے بلکہ پوٹھوہار خطے میں قدرتی طور پر فریکچرڈ کاربونیٹ میں تیل کی دوسری گہری دریافت بھی ہے۔ یہ کمپنی کے عملے کی اعلیٰ مہارت اور تکنیکی بالادستی کو ظاہر کرتی ہے۔
ماہرین کے مطابق یہ دریافت مختلف شعبوں کے ڈیٹا کے باہمی انضمام کا نتیجہ ہے۔ ارضیاتی، جیوطبیعاتی اور ریزروائر انجینئرنگ کے سائنسی تجزیوں کے بعد کنویں کے ڈیزائن کو بہتر بنایا گیا، جس کے نتیجے میں کھدائی کی پیچیدگیوں پر قابو پایا گیا اور وقت و لاگت دونوں کی بچت ہوئی۔
پی پی ایل نے اس منصوبے پر بطور آپریٹر 75 فیصد شراکت کے ساتھ کام کیا جبکہ جی ایچ پی ایل کی شراکت 25 فیصد رہی۔ ڈھوک سلطان-03 کی کھدائی کا آغاز 18 جنوری 2025 کو کیا گیا تھا اور کنویں کو 5815 میٹر کی گہرائی تک کھودا گیا۔توانائی ماہرین کا کہنا ہے کہ اٹک میں ہونے والی یہ دریافت مستقبل میں پاکستان کے تیل و گیس کے ذخائر میں اضافے کے ساتھ ساتھ درآمدی ایندھن پر انحصار کم کرنے میں بھی مددگار ثابت ہوگی۔
